Bu aar günnerdä çanımız parça-parça olêr. Acılar yarêr içimizi... Büük bela, büük kahır! Nacak gibi urdu, ansızdan.
Allaa yanına, saa tarafa, raametlileri kabletsin. Yaralılar alışsın. Türkiyem da, yaraları, sancıları sarıp, ileri gitsin.
Büük Türk milleti – Büüktür. Bu belayı da aşıp, taa güçlü, taa kaavi olacek. Güneşi genä duacek.
Büük acızgannıımı bildirerim hem dua ederim bölä bişey Allaa başka vermesin.
Kahırlan başımı iildireräk,
Akademik Todur ZANET,
Gagauz Milli Marşın avtoru, “Ana Sözü” gazetasının Baş redaktoru
“Ana Sözü” da Türkiyemizä yardım elini uzattı
Türkiye Kişinev Büükelçilii Türkiyedä er tepremesindän zarar görennerä deyni kış giyimneri hem iyecek malların yardımı için kendi bildirisini açıkladı gibi, Moldovadan hem Gagauziyadan acızgan cannardan orayı yardım gelmää başladı.
Biz da, “Ana Sözü” gazetası olarak, Türkiyedä er tepremesindän zarar görennerä deyni Türkiye Kişinev Büükelçiliinä cumaa hem cumaertesindä, iki reyslan, yardımımızı getirdik. Yardımnarımız içindä var adamnan karı kurtkaları hem paltolar, kış rubaları, kombinezonnar, cat eni yorgannar hem odeyalalar, bir çadır, konservalar, uşak mamaları, pirinç, bulgur, oloy, pamperslar hem gigiyena malları. Nicä deniler: bizdän az, ama Alşlahtan çok olsun.
Çadırdan generatorlar hem yastık-yorgan yardımı
Türkyedä biri-biri ardı olan er tepremelerindän zarar görän insannara dünneyin herbir köşesindän yardımnar gider. Yardım elini uzuttı Gagauziyanın Çadır kasabasının insannarı da.
Çadırlılar, katlanıp kim nekadar veräbilirsä, topladılar primariyada para, angılarına görä dikildi eni yorgannar, yastıklar hem alındı birkaç generator.
Bu yardımı, çadırlıların adından Türkiye Kişinev Büükelçiliinä getirän kasabanın primarı Anatoliy TOPAL açıkladı, ani “Tirkiye kardaşlarımıza yardım lääzım olduunu taa bildirincä, insannar başladılar primariyaya para getirmää. Zerä çadırlılar unutmêêrlar, nicä Türkiye, TİKAnın çalışmalarınnan, 2016-cı yılında yardım elini uzattı bizim kasabamıza, açan onu sel aldı. Saa olsunnar!”
