YERLƏ GÖY ARASINDA
Mən göy,
Sən yer adamı.
Görüşdük yerlə göy arasında.
Mənim
göy üzündəki uçuşlarım,
Sənin
yer üzərindəki gəzişmələrinə
bənzəmir əsla.
Yer üzünün yağışları
göy üzünün
göz yaşlarıdır.
Tut ucundan, çıx göyə...
ZAMANSIZ GƏLMƏ, ÖLÜM
Yaralı əsgərin dilindən
Zamansız gəlmə, ölüm!
Hələ sevmək arzusu,
sevilmək istəyi var.
Vaxtsız gəlsən, ömrümdən,
dərdləri yığıb apar.
Zamansız gəlmə, ölüm!
Bu Vətənin dağına,
daşına doymamışam.
Şuşanın torpağına,
üzümü qoymamışam.
Zamansız gəlmə, ölüm!
Burnuma yeni gəlir,
qələbənin ətiri.
Bu payız ömrümüzə,
qızıl günlər gətirir,
Zamansız gəlmə, ölüm!
Hələ nurüzlü anam,
nəvə yolu gözləyir,
Qardaş, bacı: “Toyunda,
bir qol oynayım” deyir.
Zamansız gəlmə, ölüm!
Bir az gözləmədə qal.
“Şuşa” deyən ruhumu,
sən, Cıdır düzündə al.
Zamansız gəlmə, ölüm!
YUXUDUR
Bu dünyadan axıb gedən,
Sular gözümdə dayanar.
Döymə könlümün qapısın,
Yatmış ümidim oyanar.
Ayılar yetim arzular,
Səndən istər sevgi payı.
Məhəbbət qan dənizidir,
Arzularım ac qağayı.
Həyətdə qara yel əsir,
Gülü-çiçəyi qorxudur.
Bu həyatda gördüklərim,
Hər şey yuxudur, yuxudur...
AYRILDIQ
Biz ayrıldıq.
Nə dünya məhvərindən qopmadı,
nə də zaman dayanmadı.
Biz ayrıldıq.
Nə şimşək çaxmadı,
nə də tufan qopmadı.
Biz ayrıldıq.
Nə yerdə daşlar ağlamadı,
nə də ki, göydəki buludlar.
Biz ayrıldıq.
Bir damla göz yaşı
nöqtə qoydu sevgimizə.
Biz ayrıldıq.
Sadəcə
yazıq oldu hər ikimizə...
FƏLƏK
Zərrə-zərrə qurduğumu,
Bircə anda sökdün, fələk.
Bu sinəmə çalın-çarpaz,
Nə qədər dağ çəkdin, fələk.
Rahatlığı etdin haram,
Hey sızladı könül yaram,
Yavaş-yavaş, aram-aram,
Ürəyimə çökdün, fələk.
İnsafın olaydı barı,
Nə verdinsə, hər şey yarı...
Ətəyindəki daşları,
Sən başıma tökdün, fələk.
O tökdüyün daşlar ilə,
Bu belimi bükdün, fələk...
SÖZ
Axan isti göz yaşlarım,
Soyuq əllərimdə solur.
Mən min il də gözləyərəm,
Ancaq gözlərim yorulur.
Əl üzmüşəm dünənimdən,
Bəxtim baxıb keçir gendən,
Heç bir xəbər yoxdur səndən,
Xəyalın təsəllim olur.
Sevinc mənə olub haram,
Qəm yeyirəm aram-aram,
Ürəyimi boşaldıram,
Axıb yerinə söz dolur.
Dünya nə ölməlİ yerdİr
Bu ömür ilkim-naşıdır,
Tale mənə qəm daşıdır,
Həyat ölüm savaşıdır,
Əvvəliynən sonu birdir.
Qəlbimdən keçən yollar dar,
Bu yollar hey məni yorar,
Dayandığım bir nöqtə var,
O da ki, özümə sirdir.
Dərd içində ha alış, yan,
Xoş gün gəlib olmaz həyan,
Yaşamağa yaramayan,
Dünya nə ölməli yerdir!
İSTƏDİM SƏNİ UNUDUM
İstədim səni unudum...
İlk baharı xatırladım.
Sevgimizin cücərdiyi zaman
yadıma düşdü.
İstədim səni unudum...
Qızmar yayı xatırladım.
İlk görüşün hərarəti
yadıma düşdü.
İstədim səni unudum...
Sarı payızı xatırladım.
Ayrıldığımız axşam
yadıma düşdü.
İstədim səni unudum...
Soyuq qış gecəsini xatırladım.
Saçlarıma yağan qar
yadıma düşdü.
Söylə, haradan tapım
beşinci fəsli?
Söylə, necə unudum səni?
