Bobama
Kalın kaşlar altında
Şılêêr yalpak gözlerin.
Senin geniş annında-
Vakıdın borçlu izleri.
Lafsız annêêrım sevdanı,
O kär kaplêêr taa iraktan.
Kaavi senin o ellerni
Tanıyacam bän uzaktan.
Sän neetini bu dünnedä
Tamamnadın kär bütündän:
Uşaklarını büüttün İNSAN.
Ne var taa önemli bundan?
Hepsinin sonu var ömürdä,
Hiç bişey bitkisiz kalmaz.
Haliz BOBA siirektir dünnedä,
Ama bilerim,ki kısmet bendä!
Büüktür pek adın senin
Salt gördüm deyni bu dünneyi,
Şükürlüyüm bän sana.
Ne yapsam ki,vereyim neyi?
Büüktür pek adın senin-Ana.
Saatlan salt mayıl olêrım,
Hep bakêrım üzünä.
Ne da pek sana benzeerım,
Hoş geler kär gözümä.
Nesoy,sanki,bu duygu,
Ki yaşêêr cannarmızda?
Yıl-yıldan da salt büüdü,
Çöküştü aramızda.
***
Bu nasıl, sanki, bir duygu
Kavradı ani bizi?
O kapladı bir düş gibi,
Kär uyuttu okimizi.
Dalga-dalga sevinmelik,
Damna-damna da salt şennik.
O damnalar kurdu derä,
Taşardı kär şennik erä.
Arkamızda kanat büüdü,
Uçardık dünneedä büülü.
Hiç yoktu karışan bizä,
Bizim özel dünneemizä.
Uçardık biz çok yukarda,
Kırlangaçlar sa aşaada.
Ne gözäl güneş şılêêr,
Yaamura dolay kokêr.
Te hava bulutlanêr,
Baarışlar köstek koyer.
Karannık çökmää başlêër,
Duygular da kär suêr.
O tatlı laflar biter,
Bıçaklar canı saplêêr,
Bitkiyi kırêr, daadêr.
Bir duşman gibi satêr…
***
Aldattın, kapladın, kırdın
Aldandım, dattım, sevdim.
Attım adım,
Attım bakış,
Kış…
***
Bir akıllı adam dedi bana bölä:
“Haliz SEVDA,uşaam,- o tek ömüründä”
Bän çekişärdim, direşärdim erimdä,
Savaşardım annatmaa-"O diil ölä!
Bu ömürdä türlü işlär olêr,
Ya gençkenä-kannar kaynêêr.
Karşı geler biri, ama ateş süüner,
Geler ikincisi-salt koorları kalêr".
Bunnar-salt yolcular,uşaam.
Haliz SEVDA süünmäz,gülümsedi adam.
Haliz SEVDA sana bir şafk olar.
Haliz SEVDA Adam seni yapar.
Bu payaklı yıllar arasında
Yolcuların hiç bakmêêrsın sayısına.
Ama karşı geldiynän SEVDAYA
Salt katma onu yolcuya
