Logo
Light
Dark
System
 

Şiirler

  TUDORA ARNAVUT
 01 Mayıs 2024
Sosyal Medyada Paylaş

Ben bir şairim,

 Evsiz, yuvasız,

Gezerim düşlerimin peşindä

Hep kiminsä eşiindä 

Arêrım kısmetimi.

Ben Pikasso gibi inadım

Evalla gelmerim kimseya,

Ben Modelyaniyim

Gömerim kendimi sessizlää.

Bulêrım seni çukurun dibindä

Balzak gibi üüselderim taa göklerä.

Sana duva ederim 

Ama, bari bir kere

Bakmêrsın bu yaşlı gözlerä.

Sän yerde gezen bir kurtsun

 

Cancaazım lääzım seni unutsun

Ben’sa bir şairim,

Evsiz, yuvasız,

Gezerim düşlerimin peşindä

Sän olsan eşim da

Bırak ruhum serbestlää uçsun.

06.06.2005 saat 00.24 

 

***

İş, iş, iş

Daldım onun dipsizliinä

Baaladım başıma bir `çember `

Kenarları kır çiçeklarinän dolu

Girdim kuytu bir sessizlää-

Orda salt ben hem da duygu....

Geceleri iş bir bülbül gibi

Karşıma konêr heptenä

Çiçekli çember başımda

Kokusu büüler ruhumu 

Dalêrım  sensiz  sensizliinä

Kötü ruh karşımdan 

savuuuuuuuuuş.

 

Anma Mezarlıı
Ankara'nın üsek tepesinde
Bir yıldız yalaber beş köşeli
Burası "Anma Mezarlıı"
Karanfillernen yerler döşeli
Yolunuz düşerseydi bu tarafa
Vatanınızdan getirin bir avuç toprak
Serpin o topraa her tarafa
Çünkü dalgalaneer burada Kırmızı Bayrak
Gagauzluunu annader o sana
Şıler güneşlen o yalabık!
Duruklan biraz burada, anna
Seni karşılêr
Mustafa Kemal Atatürk
 

 

Palestinanın duası 

Bu sabaa uyаndım bir bet sestän

Gözlerin tozdumannan doldu

Bomba patlamıştı karşı sokaamda

Dışarda sankı yayardı tolu

Çirkin seslär kaplamıştı aklımı

Genä cenk kokusu benzärdi kana

Doymamıştı mı bu İzrail içmä kanımızı kana kana?

Hep yaşıycekdık  bölä koşelerdä saklı mı?

Gözlerim kurumuştu kahırdan benim 

Bırakmışti beni yapa yalnız kaavi kuvedim

Allaayın kapusuna yalvarmaya geldim:

“Allahçıım uzat elini benim halkıma

Palestina kannan buulêr heptenä

Bu topraklarda duşman varken 

raat yaşamak olmıycek yakında akına,

Ama baari olülär azalsın, 

bırak onnar sarılsın kefenä.

 

Bu sabaa da uyandım cenk sesinnän

Komuşu aalardı kapumuzda..

Kaybetmişti biricik oolunu..

Taa beş yaşındaydı, hem senselemizdi da

Anası’sa korkudan çekemäzdi soluunu.

“nerdä araalım onu? Nerdä bulalım

Sokaklar bomboş, yıkık evlerin altında ölülär...

Yeter bu canavarlık Allaacım, yeter!

Ölü görmäk istemer gözlerim,

Uykuma girer bombaların sesi

Kurtar bizi bu İsrailin varvarlıından 

Uşaklar sokakalarda can vermesin!

 

Bir vakıtlar çıfitlar kuulmuştu dünnädan

İnsannık ayıplamıştı onnarın cellatlarını

Saabi olmuştu halkımız bu zavallı halka

Çıkmıştılar Palestinalılar onnara arka

Şindi’sa onnar yakêrlar günaasız yaşamakları...

Allaacım!

İnsan gibi yaşamak bizä da yazgın

Osêydı bizä dipsiz mezar mı kazdırdın?...

Yarın uyanmaa isterim cenksiz

Sana dua ederim Allahçım

Tüfeklär sussun, dozdolay olsun şansoram sesiz.

20.09.09. 

 

 

Bir ool büüttüm bän!

Bir ool büüttüm bän

Kıvrak, balaban, kaavi

Gözleri nasın bir güvem

Lafından belli onun -‘saabi!’

 

Bir ool büüttüm bän 

İnsannarlan o yalpak

Anasına karşı saygılı

Anasına’sa her yaşta o ‘uşak!’

 

Bir ool büüttüm bän

İlk yıllarda

Uykusuzdu gecelerim

Kucaamda sabaalarken

Gündüz hiç bitmärdi işim.

 

Gün gündän mayıldım hep

Herbir gülüşünä

Uşak gibi sevinärdim

Çancaaz gibi  sesinä.

 

Bir ool büüttüm bän

Vatanına ürektän saygılı

Şeremet, çalışkan, kırnak

Milletinin gelecää için da kaygılı

 

Bir ool büüttüm bän

Büükleri sayer, küçükleri beener

Herkezä örnek oldu heptän

Bakın, delikannı GAGAUZ geler! 

 

 

Hey  evlad bunu unutma!

Biz Oguz soyundanız,

Türk boyundanız

Kurêrız kendimizi dedelimizlän!

 

 Peçenek, poloveţ, kuman

Tuna boyunda durgunmuş

Dostluk içindä yaşarken

‘Uzi devletini ’ kurmuş!

 

Oguz Han, Mete Han, 

Geçmişimizdä bizä şavk etmiş

‘Dede Korkut annatlamalı’,

 adeetlerimizi saymaa üüretmiş.

 

Bir meyvalı aacıın dalları gibi

Dallanmış turkmen , türk, azerbaycan

Bu boylar- kardaş kuvedi

Gagauzluumuza verdi can!

 

Dünnääda yerimiz belli!

‘Türkçä” ana dilimiz bizim!

Dostsan uzalt elini             

Kämil sesin işidilsin!

 

Biz Oguz soyundanız

Türk boyundanız

Kurêrız kendimizi dedelimizlän!

 

19.11.11.

 

Dedelerimin ruhu bu toprakta.

Ukrainam, duuma vatanım

Burada duyulêr asirlerin sesi,

Gagauzların Oguz dedesi,

Peçenek, poloveţ , karay,

Kuman , tatar, kırımçak, nogay

Bu topraklarda vermişlär paalı canını,

Kırlar bekler onnarının kurgannarını.

 

Gelin günduusuna, bakın, heptenä

Herbir küün kenarında üüseler bir tepä

Onnar bir dev gibi yaymış kollarını,

Dedelerimizin ruhu koruyer oollarını.

 

Ukrainam, kardaşlık yerim

Kozakların şalvarları, karışık soyları

Uzun bıyıkları, kıvrak boyları

Karagöz bakışları, kopuzda çalmaları

At üstündä kuvetli naaraları

Bizim türk kanımızın karışık damlaları onnar!

Boşuna mı saygıylan anılêr bu toprakta kurgannar?!

 

Ukrainam, duuma vatanım

Burada duyulêr asirlerin sesi,

Gagauzların Oguz dedesi,

Peçenek, poloveţ , karay,

Kuman , tatar, kırımçak, nogay

Bu topraklarda vermişlär paalı canını,

Kırlar bekler onnarının kurgannarını.

 

Bu yazı Kardeş Kalemler dergisinin 209. sayısında yer almaktadır. Derginin bu sayısında yer alan tüm yazılara aşağıdaki bağlantı üzerinden ulaşabilirsiniz.
Kardeş Kalemler 209. Sayı

HaftanınÇok Okunanları