OOLUM, OOLUM!
Oolum, oolum,
yalnız uşaam[1].
Yazıım bir kiyat[2],
kalıım aşaa.
Olsa sendä,
evlat bir can,
beni kolay
sen annaycan.
Zor yıl oldu
sıra geldi,
da bukamı[3]
sana böldüm.
Korku çektim,
senin için,
korkulardan
acıyer içim.
Hasta oldun-
kahırlandım,
dirseciimdä
sabaaladım.
Döşää koydum-
semiz ettim,
günä koydum-
benmiz ettim.
Baktım seni
güncäz-güncäz,
buuttum seni
saatçaz-saatçaz.
Sendän fayda
taa olmadı,
da bän maana
hiç bulmadım.
Sade açan
baktın dürük,
ürääm oldu
çürük-çürük.
Sade açan
suuldun[4] bizä,
bän kör oldum,
dizä-dizä[5].
KOTLON BAŞINDA DÜŞÜNMAK
Koçan özü bızırdêêr,
gözlemelär çızırdêêr.
Bänim - otuz yaşında,
Karım- kotlon başında[6].
Giidim çarık sargıma,
Da bakêrım karıma.
Da sevinerim adık,
ani uygun yaşadık.
O üreemi yakmadı,
Aykırı da bakmadı,
ayaanı da urmadı
hem dürük tä durmadı.
Hatırımı güttü,
bacası hep tüttü.
İkimiz dä biz- beenim,
Yoktur hiç tuttuumuz kin,
Evda yok atıştıımız,
Sokakta kaçıştıımız.
ESKİ BUCAK
Kuşçaaz
göktâ peydalanıp, kaybeler.
Geçti yaşlık
da te kurak çekeder.
Daasız[7] bu er
çıplak sırtlar pek çoktan.
Kıvrak salkım
kalmış ona donaktan.
Dik üülendâ,
açan sıcak sarplaşêr,
er-gök yanêr,
ne var eşil-sörpeşer.
Her can aarêr er,
Sıcaktan yok olmaa,
Hepsi bakêr
bir gölgecää sokulmaa.
Salt eşillik durêr gündä kızmakta,
hem da kırda birkaç insan kazmakta[8].
Panayırdan.
İnsan daalêr,
Evä varêr
Panayırdan
Kalaba.
Hoş halları,
Çok malları,
Başlar gider
Balaban.
Oldu alış,
Oldu veriş,
Pazarlamak
Yarım gün.
Kim ne almış,
Kim ne vermiş,—
Nerdä onnuk,
Nerdä bin..
Geler boba—
Dolu torba,
Oyuncaklar
Cıngırdêr.
Geler sarfoş,
Hoşu—te hoş!
Dolu şkembä[9]
Lıngırdêr.
Almış karı
Bir plat[10] sarı—
Pencereya
Perdelik.
Almış ihtär
Yeni keptar[11],
Bakêr ona,
Çevirip.
Almış çifçi
Saamal keçi,
Evcezine
Götürer.
Almış sakat
Yeni makak[12],—
O da ona
Seviner.
****
Geldim yoldan dingin bän,
Yufka hem diil zengin dä.
Da tä, küüya girdiynän,
Selämimi verdiynän,
Küüdä insan bakardı,
Her kez bir şey sorardı.
Dostum sordu: Hep dost musun?
Ahmak sordu: Hep prost musun?
Sıkı : Borcu vercän mi?
Sarfoş : İkram edecän mi?
Kardaş : Kazanç hiç var mı?
Bana da pay olar mı?
Karım sordu: Geldin mi?
Bobam sordu: Dindin mi?
Anam sordu: idin mi?
Hazırlayan Doç.Dr.Tudora Arnaut
[1] Uşaam-evladım
[2] Kiyat-mektup
[3] Bukamı-lokmamı
[4] Suuldun-uzaklaştın
[5] dizä-dizä – ağlaya ağlaya
[6] Kotlon başına-ateşin karşısında
[7] Daa - meşe
[8] Kazmakta-çapalamakta
[9] Şkembä –karın
[10] Plat - kumaş
[11] Keptar-kısa kollu yelek
[12] Makak – koltuk deyneği
